- 224 -

1361. Nov. 28. Liegnitz.

Herzog Wenzel bekennt, mit Hülfe der Stadt Liegnitz die Brücken- und Schwarzwasser-Mühle gekauft zu haben und gelobt, den Rath und die Stadt für der nicht anzusprechen um den Salz markt, Landvogtei, Zoll und andere der Stadt gehörige Rechte.

Wir Wencislaus der erste von gotis gnaden herczog in Slezien vnd herre czu Legnicz bekennen offenbar an desim briue alle den, vor den er wirt gelezen, daz wir haben bedacht vnd angesen, daz vns vnsir lyben vnd getruwen burger vnd ratluten czu Legnicz dorczu geholfin han von der stat wegin, daz wir dy brocken mol vnd dy mol vf dem Swarczen wassir czu vns bracht han vnd gekouft vns vnd vnsin erbin mit der stat hulp, dorumb globen wir yn in guten trawen vnd ane argelist, daz wir dyselben molen vns nach vnsirn erbin nicht entphremden sullen noch enwollen, nach in keine fremde hant brengen, were abir, das wir sy in keine fremde hant brechten, des got nicht enwolle, so sullen sy mit der stad schossen vnd in der stad recht bleiben als vor, vnd dyselben molen sulle wir vnd vnsir erben vnd nachkomelinge haben vnd besiczen, alz sy vnse eldirn gehabt han vnd besessen vnschedelich andirn molen vnd ouch vnschedelich vnsem rechte an vnsirn molen, dorczu gelobe wir vnsen burgern vnd ratluten czu Legnicz in guten truwen ane argelist alzuor, daz wir sy nach vnse stat Lignicz vorbas me nymmir an gesprechin sullen nach enwollen vm den salczmarkt, vm dy landvoytie, vm den czol, nach vm andir erbe adir keynerley recht, daz vnsir stat czu gehoret, sundir wir globen, sy do by czu lasen vnd czu behalden nach ire briue lut, dy sy darobir haben, vngehindirt, mit orkund des briues, den wir yn darobir han geheysen geben, vorsigilt mit vnsem anhangenden ingesigil. Gegeben czu Lignicz an dem suntage, alz man singit in der heyligen kirchen Ad te leuaui, nach Cristi geburt driczenhundirt iar dornach in dem eyn vnd sechczegisten iare.

O. d. St. L. No. 100. Das Wappensiegel in rothem Wachs der sehr beschädigten Urkunde ist an Pergamentstreifen völlig erhalten. — Bitschens Privilegb. f. XVIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866